اول مرة اكتب معاكوا بس تعالوا نعتبر ان كل مرة هتكلم فيها معاكوا هكون بكلم نفسي وبشاركوا قعدتنا .. وانتوا بتقرأوا هتكونوا كمان بتوجههوا الكلام لنفسكوا .. 

يعني مثلا دايما بنقول “ تعالى لما اقولك كلمتين في سرك " .. طب عمرك جربت تقعد مع نفسك وتقول " كلمتين في سري " .. ولأن بينك وبين نفسك كتير .. الكلمتين دول ليها .. 

غالبا سبب كل مشاكلنا اننا بندور على صورتنا وشكلنا في عين الناس .. قبل ما بنشوف نفسنا في عيننا .. دايما مستنين حد يقولنا انت حلو  .. انت صح .. انت ناجح .. انت تقدر .. 

لكن الحقيقة واللي في الغالب في زمننا ده بيحصل ان الكلمة الحلوة بقت صعبة وكأنها بفلوس .. في الغالب هيكون سهل جدا تسمع انت شكلك تعبان .. انت وشك مرهق .. كان ممكن تعملها احسن من كده .. كان ممكن تلبس اشيك من كده .. الحياة صعبة ومش هتقدر عليها .. الدنيا غالية ومش هتعرف تجاريها .. وهكذا .. فبالتالي انت بتتعامل مع الكلام ده على أساس انه مراية نفسك وبتروح معاه .. فندخل بقى في دوامة الضيق وكسرة النفس والاحباط والفشل .. 

محدش عاش تفاصيل رحلتك غيرك عشان يكون مرايتك .. ومحدش كبر حلمك جواه زي ما كل خلية في جسمه بتكبر معاه .. محدش عنده نفس امكانياتك ولا طاقتك .. عشان يقولك هتقدر ولا مش هتقدر هتنفع ولا مش هتنفع .. محدش خلقك عشان يحكم على تفاصيلك وشكلك وحياتك .. ومتطلبش من حد يصدقك ويأمن بيك غير نفسك .. كل اللي نجحوا صدقوا في عز ضعفهم انهم اقوياء .. ووقت نجاحهم نفس الناس اللي احبطتهم ، ضربوا بيهم المثل ..

مصدر الصورة: انستجرام: Juliatrotti@