English

    Fustany on Instagram Fustany on Facebook
    تابعي موقع فستاني للموضة والجمال
من فضلك قم باغلاق مانع الاعلانات لكى تستطيع مشاهدة محتوى الموقع كاملا
لايف ستايل Header image amr badawy mistakes to avoid if you are applying for shengen visa ar main image fustany

| بقلم عمرو بدوي

١٠ أخطاء عند التقديم لتأشيرة أوروبا

السفارة البريطانية بالقاهرة أصدرت بيان رسمي بأهم ١٠ أسباب رفض للتأشيرة، واللي يعتبروا من أهم أسباب الرفض لجميع سفارات أوروبا. هقولكم الأسباب العشرة نصاً كما ذكرت في بيان السفارة، وبعدين هشرح كل نقطة بالتفصيل.

١- تقديم كشف حساب بنكي باللغة العربية. كشف الحساب لازم يكون كله باللغة الإنجليزية بما في ذلك اسم صاحب الحساب.

لو فريق العمل في السفارة غير عربي، هيكون محتاج كشف الحساب بلغة يعرفوا يقروها. قد تكون دي الحالة أيضا في بعض السفارات الأوروبية الصغيرة اللي لا تمتلك موظفين بيقروا عربي. الحل ساعتها أنك تتأكد من لغة المستندات المطلوبة كلها للسفارة. لو البنك بتاعك لا يصدر كشف حساب إلا باللغة العربية، عليك ترجمته في مكتب ترجمة معتمد لدى السفارة.

٢- المتقدمين للحصول على التأشيرة بيذكروا قيمة المرتب في خطاب العمل بدون ظهور ذلك الرقم في كشف الحساب.

لازم المرتب المكتوب في خطاب العمل بتاعك يظهر في كشف الحساب بتاعك المتقدم بيه للسفارة. لو عندك حسابات توفير أو شهادات، قدمها هي كمان مع كشف الحساب الرسمي للمرتب بتاعك. لو أنت معندكش كشف حساب لمرتبك والشركة بتدفعلك كاش أو Freelancer يبقى تعمل إيداع بمرتبك كاملا كل شهر في ميعاد ثابت وبعد كدة إبقى اصرف منه وهو في الحساب.

٣- عمل إيداعات غير معلومة المصدر وغير متوقعة في كشف الحساب البنكي. يجب عليك إيضاح طبيعة هذه الإيداعات والأصول.

طبعا في ناس للأسف بتعمل إيداع كبير مرة واحدة في كشف الحساب قبل طباعته للتقديم على التأشيرة. الموظف مش ساذج علشان يبلع حركة ساذجة زي دي. اعمل إيداع لرقم متوسط قبل التقديم بـ ٦ شهور، وبعدين اعمل إيداعات صغيرة وقول إن ده شغل إضافي عندك، إيجار شقة، شهرية ميكروباص، شغال على تاكسي بالليل، المهم يكون ليه مسمى "مصدر دخل".

٤- تقديم كشف حساب لأصول في صورة "سندات" بدون جواب من البنك يوضح حق العميل لاستخدام هذه الأموال في أي وقت.

غالبا المقصود بذلك شهدات استثمار في صناديق مالية مملوكة للبنك، أو شهادات قناة السويس، أو شهادات أوعية إدخارية طويلة الأجل. مطلوب منك وأنت بتقدم الشهادات دي أنك تجيب جواب من البنك يؤكد أن الشهادات دي مش مرهونة مثلا نظير قرض أو بطاقة إئتمانية وأن بإمكانك صرف هذه الأموال المملوكة لك في أي وقت.

٥- الموظفين لا يتقدموا بخطاب من جهة العمل موضحا سنوات العمل والمرتب الشهري.

طبعا اتكلمنا عن أهمية خطاب العمل وأنه لازم يوضح وظيفتك، سنوات إلتحاقك بالعمل، المرتب الشهري، الموافقة على الإجازة وتاريخ رجوعك منها، وحاجات كتير.

لو أنت طالب، بتقدم شهادة قيد جامعي أو مدرسي. ممكن كمان تقدم ما يفيد أنك دفعت مصاريف العام الجديد (لو بتقدم في إجازة الصيف)، علشان يعرفوا أنك دافع المصاريف وأكيد راجع تكمل دراستك. طبعا تقديم وصل المصاريف لطلاب كلية تجارة مثلا زي حالاتي لن يكون له فايدة لأن المصاريف أكيد ١٠٠ جنية في السنة ولا حاجة هاهاهاها. ولا غليت؟

٦- رؤساء مجلس إدارة الشركات والمساهمين: تقديم الحسابات البنكية الخاصة بالشركة بدون تقديم خطاب من البنك يؤكد أحقية المتقديم للسحب من هذا الحساب.

يعني لو أنت صاحب نشاط تجاري وقدمت الأوراق المطلوبة لإثبات ملكيتك للنشاط ده (سجل تجاري وبطاقة ضريبية)، لازم تقدم مع كشف حساب الشركة جواب من البنك بأسماء من لهم حق السحب والتوقيع على الحسابات دي. لو كان حسابك يتطلب توقيعين للسحب، يبقى لازم تقدم موافقة الطرف الثاني على الإنفاق من هذا الحساب.

٧- أولياء الأمور: التقديم على التأشيرة لأولادكم بدون تقديم كشف حساب بنكي وبدون خطاب يؤكد على نيتكم بتغطية نفقات السفر.

للطلبة والعاطلين عن العمل ولسة أهلهم متكفلين بيهم ماديا، طبعا لازم تقديم كشف حساب من أحد الوالدين، أو قريب درجة أولى مع إثبات صلة القرابة. يعني لما تقدم بكشف حساب خالك أو خالتك مثلا، لازم تقدم شهادة الميلاد لتثبت صلة القرابة بينكم. لو أسماء عمك أو عمتك مختلفة عن اسمك شوية، ممكن تقدم برضوه ما يثبت صلة القرابة مع أبوك. لازم كمان تقدم جواب بالإنجليزي فيه موافقة من ولي أمرك بأنه ناوي يصرف على تكاليف رحلتك ويوقعه فقط مع بيانات التواصل بتاعته وصور جواز سفره أو بطاقته.

٨- أولياء الأمور: سفر أحد الوالدين مع الأطفال بدون تقديم موافقة الوالد الآخر للسفر منفردا بالأطفال.

في حالة سفر الأب أو الأم لوحدهم وغير مجتمعين (في حالة إنفصال، طلاق، أي ظروف مشابهة) مع الأطفال، لازم تقدم موافقة الطرف الآخر على السفر. بعض السفارات بتطلب موافقة رسمية ممضية ومشهرة في الشهر العقاري، البعض الآخر بيطلب موافقة خطية مكتوبة على صورة جواز سفر الطرف الآخر. كان ليا تجربة سفر مع بنتي إلى فرنسا من ٣ سنوات وقامت مامتها بكتابة الآتي: "أقر أنا فلان الفلاني، بموافقتي على سفر ابنتي مع والدها إلى فرنسا من تاريخ كذا إلى تاريخ كذا، على أن يعودا بعد إجازتهم سويا إلى القاهرة في تاريخ كذا"... ممكن تتأكد كمان من الصيغة في السفارة وطريقة تصديقها على الموافقة (كتابية فقط ولا لازم مسجلة في مكان رسمي).

٩- للرحلات الرسمية: التقديم على تأشيرة بدون المستندات الداعمة مثل: تفاصيل المتقدم، تفاصيل سبب الزيارة، خطاب دعوة، أو تأكيد على تغطية النفقات. في حالة مصاحبة عضو في العائلة للمتقدم، يجب التقدم بما يفيد القدرات المالية لتغطية نفقات العائلة (كشف حساب بنكي وأصول أخرى).

يعني لو مسافر إجتماعات شغل أو تحضر معرض أو مؤتمر، لازم تقدم جميع التفاصيل عن طبيعة زيارتك والهدف منها، جواب دعوة من الشركة أو المؤتمر، مصاريف الاشتراك في المعرض أو المؤتمر. إثبات لتغطية نفقات الرحلة من شركتك اللي مسافر معاها أو الشركة المستضيفة ليك هناك. لو مسافر معاك أحد أعضاء عائلتك، واخد مراتك معاك المؤتر ولا المعرض، لازم تثبت قدرتك على تغطية نفقاتكم في الرحلة وتقدم كشف حساب بنكي خاص بك شخصيا أو بيها.

١٠- الرحلات المدعومة: الإخفاق في تقديم كشف حساب بنكي خاص. حتى ولو كانت رحلتك مدعومة، يجب تقديم كشف حساب بنكي شخصي.

يعني لو شركة عزمتك على رحلة ومتكفلة بجميع مصاريفها وقدمت كل الإثباتات المطلوبة في النقطة السابقة، لسة برضوه لازم تقدم كشف حساب البنك الخاص بك.

الخلاصة:

من الواضح أن أحد أهم الأسباب في الرفض هو الفشل في عدم إثبات القدرة المالية وتقديم كشف حساب مقنع للسفارة بقدراتك المالية وعدم نيتك الهرب إلى بلادهم وعدم الرجوع مرة أخرى.

شير مع اللي ناوي يسافر أوروبا قريب واترفض أو خايف يترفض.






تصنيفات سفر  ميزانية السفر  فوائد السفر  ترحال