عمرو بدوي 
ناس كتير لحد النهاردة لسه عندها تخوف من استخدام الكريدت كارد في عمليات الشراء أو الحجز أونلاين، تخوفا من السرقة أو القرصنة أو ناس تانية أكثر مالهاش في وجع الدماغ بتاع البنوك والكروت وتحب تتعامل بمبدأ الكاش في كل تعاملتها. إزاي بقى ممكن نلاقي تذاكر رخيصة ونشتريها من غير ما نستخدم الكريدت كارد.
حجز التذكرة والدفع لاحقا
شركات طيران زي مصر للطيران والتركية والقطرية بتوفر خدمة الحجز دلوقتي وبعدين الدفع لاحقا Pay Later. لو لقيت عليهم أرخص تذاكر طيران، احجز عليهم وممكن الدفع من خلال مكاتبهم مباشرة أو من خلال خدمة فوري المتوفرة في كل مكان دلوقتي. طيب لو التذكرة الأنسب والأرخص مش على المواقع دي، نعمل إيه؟
موقع شركة Flyin
شركة فلاي إن بدأت تقديم خدماتها في السوق المصري في ٢٠١٧، بعد تواجد استمر سنين في دول الخليج. من أهم الخدمات اللي بتقدمها الشركة، هي إمكانية حجز تذاكر طيران مع أي شركة في العالم والدفع لاحقا من خلال خدمات "فوري" أو قريبا خدمة جديدة اسمها "Bee" متوفرين في كل مكان دلوقتي.
بعد ما تستخدم محركات البحث المتعددة علشان تلاقي أرخص وأنسب تذكرة، شوف سعرها على موقع Flyin وهتلاقيها بنفس السعر أو أرخص كمان، وهتقدر تشتريها من غير كريدت كارد خالص.
مميزات أخرى لموقع Flyin
- خدمة عملاء ٢٤ ساعة -قبل وبعد البيع. الاتصال بيكون عن طريق رقم محلي 19679 وبيردوا عليك بالعربي وبدون انتظار كتير. انتظروا مقالة قريبا عن أهوال خدمة العملاء لشركات الطيران المختلفة وإيه المواقف اللي بتحتاج فيها خدمة عملاء قبل وبعد شراء التذكرة.
- الدفع بيكون بالجنيه المصري مش بالعملة الأجنبية. حتى لو هتدفع بالكريدت كارد أونلاين، فيه مصاريف تدبير عملة أجنبية من البنك في حدود ٤٪ - ٦٪ لأي شراء بالدولار. فأنت باستخدامك موقع Flyin هتوفر ٤٪ - ٦٪ من ثمن التذكرة علشان وفرت عمولة تدبير دولار. لما تعمل مقارنة بين Flyin ومواقع الطيران الأخرى بالدولار، احسب عمولة التدبير اللي البنك هياخدها منك علشان تكون المقارنة عادلة.
هل في طرق ثانية ممكن نحجز بيها من غير استخدام الكريدت كارد؟ اكتبولي في التعليقات.
